កាលពីថ្ងៃទី០២ ខែធ្នូ ឆ្នាំ២០១៤កន្លងទៅថ្មីៗនេះ តុលាការថៃបានចេញដីកាស្វែងរកចាប់ខ្លួនពាណិជ្ជករថៃម្នាក់ ដែលមានទ្រព្យសម្បត្តិច្រើនបំផុតក្នុងចំណោមពួកអ្នកមានៗនៅប្រទេសថៃ ក្រោមបទចោទប្រកាន់ជាច្រើនករណី រួមទាំងការរំលោភបំពានលើច្បាប់ប្រឆាំងការប្រមាថស្តេច ការគំរាមកំហែងទាមទារប្រាក់ និងការបំភិតបំភ័យ ។
ពាណិជ្ជករថៃដែលប្រឈមនឹងការស្វែងរកចាប់ខ្លួននោះ គឺលោក Nopporn Suppipat អាយុ៤៣ឆ្នាំ ជាស្ថាបនិក និងជាប្រធានក្រុមហ៊ុន Wind Energy Holding Co., Ltd.(WEH) ។ លោក Nopporn Suppipat ត្រូវបានគេប៉ាន់ស្មានថា មានទ្រព្យសម្បត្តិប្រមាណ៨០០លានដុល្លារអាមេរិក ហើយលោកកំពុងរត់គេចខ្លួនទៅក្រៅប្រទេស ខណៈសេដ្ឋីថៃរូបនេះធ្លាប់បានជួលមនុស្សឲ្យទៅចាប់ពង្រត់ពាណិជ្ជករម្នាក់ដែលបានជំពាក់លុយគាត់ ៕